वाटा

वाटा...चालता न येणार्‍या
कधी दुरुनच पाहताना
न भेटल्या वळणांची
मनांत होते दाटी
तेव्हा मग उगीच वाटतं
अनपेक्षितपणे
होतील सरल्या क्षणांच्या
मनांतच गाठी भेटी

तू न सांगताच पुन्हा एकदा
मला सारं काही कळेल
पुन्हा हसरी खोडकर बट
तुझ्या गाली रुळेल
मी पावसात भिजल्यावर
ढग तुझ्या डोळ्यांत दाटून येईल
पुन्हा एकदा खास प्रेमाची
वाफाळलेली कॉफी होईल
पुन्हा जाई जुई चाफा
मनांमध्ये मोहरून येईल
न चुकता मोगरा देखील
सुगंधी हजेरी लावून जाईल

आजवर ह्या सुगंधातील
फरक मला कधी कळलाच नाही
फुलांकडे तुझ्या नजरेने पहाण्याचा
उत्साह देखील आताशा उरला नाही
ओळखीचे रस्ते कसे कोण जाणे
पण वाट चुकून देखील पायाखाली आलेच नाहीत
आयुष्याच्या सरळ रेषा
वळवून देखील कधी वळल्याच नाहीत

वाटा...चालता न येणार्‍या
कधी दुरुनच पाहताना
वळता न आल्या वळणांची
मनांत होते दाटी
तेव्हा मग उगीच वाटतं
अनपेक्षितपणे
होतील कधी पुन्हा चुकून
अपुल्या क्षणिक गाठी भेटी?

- shuma