अलविदा

आता ती वेळ आलीये !

उशालगतच्या टेबल लँपपाशी ठेवलेला तुझा जीवनदायी फोटो,
तुझ्या कॉफी कपवरचा लिपस्टिकचा अजून जपलेला पुसट ठसा,
कित्येक बेधडक साहसी सुखांचा सोबती : खोलीतला शान्देलिएर,
आणि त्याच्या रिमझिम प्रकाशातून झरणार्‍या असंख्य स्मृति-शलाका,
मडोनाचे गहिरे बलाड्स थेट ह्रदयात पोचवणारा गिफ्टेड वॉकमन..
.. हे सगळंच सोडण्याची.

वेगळ्या वाटांची अनवट स्वप्ने रुजवली आपण एकमेकांत याच खोलीत,
तेव्हापासूनचे हे सारे सोबती !

परिस्थितीने तुझे नास्तित्व, माझ्यासाठी
अधिकाधिक अर्थपूर्ण एकटे करणारे सारेच...धागे-दोरे..

शांततेचा हा विब्रातो घुमतो आहे अगदी आतून आज..

कुणी सांगावे,
कदाचित तुझ्या-माझ्या तुटल्या तारांचे त्याच खोलीतले अँटिक गिटार
वाजू लागेल मी नसताना.. तुलाही ऐकू येइल हाच सूर..

अहंभावाचा सारा लखलखाट मालवून तू निजशील त्याच शान्देलिएरखाली
तेव्हा.... चालू लागशील तू माझ्या मागे तुझ्या परतण्याची वाट पाहत, तुझ्याही नकळत

- samurai