हे घर माझे नाही अन् मीही इथली नाही
सोनेरी पाण्यामधली मासोळी स्वजली नाही
आत्म्याच्या नुसत्या गप्पा, बांधील प्रवाहालाच
मी काय वेगळी म्हणून मिरवू? हाताला बोटे पाच
घडते ते स्वीकारावे अन् दिसल्या वाटे जावे
पण खेळ मनाचे अजब, धुंडते रोज वेगळी गावे
भोगांची गणिते चुकती, कर्मांची बाकी उरते
हा तुझाच अट्टाहास, नशिबावर सटवी फिरते
मग निर्वातातुन कुणी सांडते गहिरे अनवट गाणे
थकल्या दिवसाखेरी झळके पायी सुवर्णनाणे
मी शांत अता गर्भात निजण्यास पुन्हा आतूर
पुढच्याचा पत्ता नाही अन् जुने राहिले दूर
- sanghamitra