तुझे गीत गाण्यासाठी

तिन्ही लोक आनंदाने भरुन गाउ दे रे
तुझे गीत गाण्यासाठी सूर लावूं दे रे ॥ धृ ॥

शुभ्र तुरे माळून आल्या, निळ्या निळ्या लाटा
रानफुले लेवुन सजल्या, या हिरव्या वाटा
या सुंदर यात्रेसाठी, मला जाउ दे रे ॥ १ ॥

मोर केशराचे झुलती पहाटेस दारी
झर्‍यातुनी दिडदा दिडदा वाजती सतारी
सोहळ्यात सौंदर्याच्या तुला पाहु दे रे ॥ २ ॥

शांत शांत उत्तररात्री मंद मंद तारे
तुझे प्रेम घेउन येती गंधधुंद वारे
चांदण्यात आनंदाच्या मला न्हाउ दे रे ॥ ३ ॥

एक एक नक्षत्राचा दिवा लागताना
आणि फुले होण्यासाठी कळ्या जागताना
पोर्णिमा स्वरांची माझ्या, तुला वाहु दे रे ॥ ४ ॥