मज नकोत अश्रू घाम हवा

मज नकोत अश्रू, घाम हवा, घाम हवा
हा नव्या युगाचा मंत्र नवा, मंत्र नवा

होते तैसी अजुन असे मी
सधन अन्नदा सुवर्णभुमी
खंडतुल्य या माझ्या धामी
का बुभुक्षितांचा रडे थवा?

अपार लक्ष्मी माझ्या पोटी
का फिरसी मग माझ्या पाठी?
एक मूठभर अन्नासाठी
जगतोस तरी का भ्याड जीवा?

काय लाविसी हात कपाळी?
फेकून दे ती दुबळी झोळी
जाळ आळसाची पेटव होळी
तू जिंक बळाने पराभवा

मोल श्रमाचे तुला कळू दे
हात मळू दे, घाम गळू दे
सुखासिनता पूर्ण जळू दे
दैन्यास तुझ्या हा एक दवा