माझा मुलगा

मुलीसारखी माया करतो माझा मुलगा
झाड होऊनी छाया धरतो माझा मुलगा

मुलासारखा,भांडत बसतो,कधी कधी पण-
तुटेल इतके ,ताणत नाही माझा मुलगा

कसा राबतो , रोज रोज मी , पाहून आता
मुलांसारखा खेळत नाही माझा मुलगा

परिश्रमातून ,पैसा येतो , बघितल्यावर
हट्ट जराही करीत नाही माझा मुलगा

थकलो आहे त्याला कळते , मायेने मग-
डोक्यावरती हात फिरवितो माझा मुलगा

मायेने मी पंख खाली त्याला घेतो
उब तरीही मलाच देतो माझा मुलगा

खर्चाचाही हिशेब जेव्हा ,चुकतो माझा
गल्ल्यामधली चिल्लर देतो माझा मुलगा

शहर पेटले, दंगल झाली , गर्दी मधुनी -
सांभाळून या , सांगत असतो माझा मुलगा

अपंग असुनी , अभंग आहे बापाचे मन
सांगत असतो मित्रांनाही माझा मुलगा

मी कवितेशी , बोलत असतो, पाहून तोही
कवितेच्या प्रेमात अडकला माझा मुलगा

पडतो,झडतो, रडतो मी ही मुलासारखा
बाप होऊनी, धीर देतसे, माझा मुलगा
- कमलाकर देसले