परिकथेतील राजकुमारा

परीकथेतील राजकुमारा, स्वप्नी माझ्या येशील का ?
भाव दाटले मनी अनामिक, साद तयाना देशील का ॥ ध्रु ॥

या डॊळ्यांचे गूढ इशारे, शब्दावाचुन जाणुन सारे
राणी अपुली मला म्हणोनी, तुझियासंगे नेशील का ॥ १ ॥

मूर्त मनोरम मनी रेखिली, दिवसारात्री नित्य देखिली
त्या रुपाची साक्ष जिवाला, प्रत्याक्षातुन देशिल का ॥ २ ॥

लाजुन डोळे लवविन खाली, नवख्या गाली येईल लाली
फ़ूलापरी ही तनू कापरी, हृदयापाशी घेशील का ॥ ३ ॥

लाजबावरी मिटुन पापणी, साठवीन ते चित्र लोचनी
नवरंगी त्या चित्रामधले, स्वप्नच माझे होशिल का ॥ ४ ॥