पाचोळे

काय कुणासी देऊ, कुणाचे घेऊ ?
वणवण भटके वनांतले, पाचोळे आम्ही वादळातले ॥ ध्रु ॥

कधी भरारी अथांग गगनी, न कळे केव्हा येतो अवनी
मोहपाश ना आम्हा कुणाचा, स्वैर आम्ही अपुले ॥ १ ॥

तरलो त्या प्रक्षुब्ध सागरी, आणि उतरलो दरी कपारी
वसुंधरेचे रुप अनामिक, तेहि दुरुन देखिले ॥ २ ॥

इतके असुनी अमुचे काही, वैर कुणाशी कसले नाही
कसेही असो, आम्ही मानतो, जीवन अमुचे भले ॥ ३ ॥

कुठे आमुची असते वसती, आस्थेने ना कोणी पुसती
अंध खलाशापरी आमुचे, जीवन नौकेतले. ॥ ४ ॥