आली बघ गाई गाई, शेजारच्या अंगणात
फ़ुललासे निशिगंध, घोटाळली ताटव्यांत ॥ १ ॥
आली बघ गाई गाई, चांदण्याचे पायी चाळ
लाविले का अवधान, ऐकावया त्यांचा ताल ॥ २ ॥
आली बघ गाई गाई, लावी करांगुली गाली
म्हणुन का हंसलीस, उमटली गोड खळी ॥ ३ ॥
आली बघ गाई गाई, लोचनांचे घेई पापे
म्हणून का भारावले डोळे माझ्या लाडकीचे ॥ ४ ॥
आली बघ गाई गाई, काढीतसे लांब झोका
खेळूनिया दमलीस, मीट मोतियांच्या शिंपा ॥ ५ ॥
गाण्याचे आद्याक्षर:
गाण्याचा प्रकार: