मधुघट

मधु मागशि माझ्या सख्या परी
मधुघटचि रिकामे पडति घरी ॥ ध्रु ॥

आजवरी कमळाच्या द्रोणी, मधु पाजिला तुला भरोनी
सेवा ही पूर्वीची स्मरोनी, करी रोष न सखया, दया करी ॥ १ ॥

नैवेद्याची एकच वाटी, अता दुधाची माझ्या गाठी
देवपुजेस्तव ही कोरांटी, बाळगी अंगणी कशी तरी ॥ २ ॥

तरुण तरुणिंची सलज्ज कुजबुज, वृक्षझर्‍यांचे गुढ मधुर गुज
संसाराचे मर्म हवे तुज, मधु पिळण्या परि बळ न करी ॥ ३ ॥

ढळला रे ढळला दिन सखया, संध्याछाया भिवविती हृदया
अता मधुचे नाव कासया, लागले नेत्र रे पैलतीरी ॥ ४ ॥