गोरी गोरी पान

गोरी गोरी पान, फुलासारखी छान
दादा मला एक वहिनी आण ॥ ध्रु ॥

गोर्‍या गोर्‍या वहिनीची अंधाराची साडी
अंधाराच्या साडिवर चांदण्याची खडी
चांदण्याच्या पदराला बिजलीचा बाण ॥ १ ॥

वहिनीला आणायाला चांदोबाची गाडी
चांदोबाच्या गाडीला हरणांची जोडी
हरणांची जोडी तुडवी गुलाबाचे रान ॥ २ ॥

वहिनीशी गट्टि होता, तुला दोन थापा
तुला दोन थापा, तिला साखरेचा पापा
बाहुल्यांच्या परी होउ दोघी आम्ही सान ॥ ३ ॥

गाण्याचे आद्याक्षर: 
गाण्याचा प्रकार: 

प्रतिसाद

श्रीनिवास खळे यांच्यावरील 'नक्षत्रांचे देणे' या कार्यक्रमात सांगितल्याप्रमाणे हे गाणे 'लक्ष्मीपूजन' या चित्रपटासाठी म्हणून लिहीले गेले होते, पण दुर्दैवाने तो चित्रपट पूर्ण झालाच नाही.