कंठातच रुतल्या ताना, कुठें ग बाई कान्हा
कुणितरी जा, जा, जा, घेउनि या मोहना ॥ ध्रु ॥
कदंब फांद्यावरी बांधिला, पुष्पपल्लवगंधित झोला
कसा झुलावा परि हा निश्चल, कुंजविहारीविना ॥ १ ॥
थांबे सळसळ जशि वृक्षांची, कुजबुज सरली झणि पक्षांची
ओळखीचे स्वर कानि न येता, थबके ही यमुना ॥ २ ॥
मुरलीधर तो नसतां जवळी, सप्तस्वरांची मैफल कुठली
रासक्रिडेची स्वप्ने विरली, एका कृष्णाविना ॥ ३ ॥
गाण्याचे आद्याक्षर:
गाण्याचा प्रकार: