रात्र आहे पोर्णिमेची

रात्र आहे पोर्णिमेची, तू जरा येऊन जा
जाणिवा थकल्या जिवांच्या, एकदा ऐकून जा ॥ धॄ ॥

निथळला तो भाव सारा वितळल्या चंद्रातुनी
मिसळल्या मॄदु भावनाही झोपल्या पानांतुनी
जागती नेत्रातली ही पाखरे पाहून जा ॥ १ ॥

पांखरे पाहून जा, जी वाढली पंखाविना
सूर कंठातील त्यांच्या जाहला आता जुना
त्या पुराण्या गीतिकेचा अर्थ तू ऐकून जा ॥ २ ॥

अर्थ तू ऐकून जा, फुलवील जो वैराणही
रंग तो पाहून जा, तो तोषवी अंधासही
ओंजळीच्या पाकळ्यांचा स्पर्श तू घेऊन जा ॥ ३ ॥