बनात आली बहार पिवळी

बनात आली बहार पिवळी उगाच हरिणी बावरली
उत्सव येता नवनवतीचा नव्हाळ काया कस्तुरली॥धृ॥
दरवळणारा पहाट वारा निळ्या आभाळी हवा उडे
मावळतीला चंद्र केशरी क्षितिजावरती रंग चढे
रूप पहाते पहाट पवळी प्रभा जळावर अंथरली॥१॥
उत्सव भरता प्रीत फुलांचा दिसू लागते स्वप्न तिला
पैंजण बांधुनी पहाट येते झर्‍यात झुलते नृत्यकला
प्राण सख्याच्या स्पर्शासाठी चंदन राई थरथरली ॥२॥
जळात शिरण्या अधीर जाहली मनात फुलती आठवणी
चैतन्याची लहर उजळते दुरून घालतो साद कुणी
नवीन दिवस हा घेऊनी आला वन वेळुतुन मुरली॥३॥