वेळ झाली भर माध्यान्ह
माथ्यावर तळपे ऊन
नको जाऊ कोमेजुन, माझ्या प्रीतिच्या फुला
तप्त दिशा झाल्या चारी
भाजतसे सृष्टी सारी
कसा तरी जीव धरी, माझ्या प्रीतिच्या फुला
वाहतात वारे जळते
पोळतात फुलत्या तनुते
चित्त इथे मम हळहळते, माझ्या प्रीतिच्या फुला
माझी छाया माझ्याखाली
तुजसाठी आंसावली
कशी करू तुज सावली, माझ्या प्रीतिच्या फुला
दाटे दोन्ही डोळां पाणी
आटे नयनांतच सुकोनि
कसे घालु तुज आणुनि, माझ्या प्रीतिच्या फुला
मृगजळाच्या तरंगात
नभाच्या निळ्या रंगात
चल रंगू सारंगात, माझ्या प्रीतिच्या फुला
गाण्याचे आद्याक्षर:
गाण्याचा प्रकार: