ज्ञ

ज्ञानदेव बाळ माझा, सांगे गीता भगवंता
लक्ष द्या हो विनवीते, मराठी मी त्याची माता ॥ धॄ ॥

गोड माझ्या सोनुल्याचा, लळा लागे बालपणा
बांधुनीया घुंगुरवाळे, अंगी नाचे थोरपणा
निरुपण सांगायाला, तुम्ही द्या हो शहाणपणा
बाळमुखी मोठा घास, भरवा हो जगन्नाथा ॥ १ ॥

निरक्षर लोकांसाठी, प्राणांचेहि देउन मोल
अमृताते जिंकुन पैजा, धांवे मराठाची बोल
ज्ञानदीप डोळिंयांचे, तेजाळतां तेजोगोल
देवगुरु खाली आले, जोडोनिया दोन्ही हाता ॥ २ ॥