माती

मी माझ्या मातृभूमीतून आणून टाकतो
खूप सारी माती
या परक्या मुलखातल्या परसदारी..
पाऊस पडला की
श्वासात आवर्जून भरून घेतो
दूरवर पसरू पाहणारे गंध माझ्या मातीचे...
कधी खूप एकटं एकटं वाटलं की
चालून घेतो अनवाणी पायांनी
माझ्याच मातीत...
मातीशी अजूनही नाळ तुटली नाही
एवढंच समाधान मनाला...
उद्या माझ्याच मातीने मला विचारू नये,
'तुझे नि माझे नाते काय?'
आणि 'पुसू' नये ओळख
आमच्या संबंधाची..
दरवेळी मातृभूमीतून येताना
मी आणत असतो
माझी माती
माझ्यासाठी...